Monterroso na Ulloa, na Galicia do interior, ofrécese ao mundo a través deste Portal Web e quere facelo mostrando o mellor de si, que non é mais que a disposición das súas xentes cara a conrobla do País.
O río Ulla e a Feira de Santos falan de nós, pero tamén os Castelos de Ambarría ou o románico reflectido nas vellas pedras, o patrimonio da auga, os regatiños, os muíños e A Peneda, como elementos a destacar.

Monterroso é hoxe unha gran vila de servizos: mercado de gando, servizo comarcal de agricultura, gardería, orientación laboral, servizos de cultura, punto limpo, vertedoiro de inertes, servizo de gas a domicilio, cámping, couto de pesca intensiva, mercados de Sta Lucía, feiras de primeiro de mes, protección civil, albergues no Camiño de Santiago, etc e outros que proximamente entrarán en funcionamento como a aula multimedia, novo centro de saúde ou novo colexio.
Pero voltemos ao Ulla e a súa conca para valorar a paisaxe, encumbrar as troitas, descansar na área recreativa da Peneda, lugar singular para aplaudir e descansar da camiñata polo Camiño de Santiago, polo románico máis atractivo (Valboa, Fente, Esporiz, San Lourenzo, Novelúa, etc), polas rutas de sendeirismo.
En fin, ao lado do bo acollemento que ofrecemos aos visitantes, paga a pena disfrutar do que temos.
Mágoa que moitos dos nosos conveciños e conveciñas estean fóra e non poidan compartir con nós o que tamén é deles: o seu Monterroso, as súas parroquias, a eles decímoslles que todo o que hai e o que poidamos atesourar e sobre todo o noso cariño, están agardando que volten.

Antonio Gato Soengas
Alcalde de Monterroso